Prezidentin general rütbəsi verdiyi zabitlər kimdir? Bəs istefaya göndərənlər kimdir?!
Xəbər verdiyimiz kimi, Prezident İlham Əliyev Dövlət Sərhəd Xidmətinin 4 hərbi qulluqçusuna – general-mayor Cavid Mirhəmzə oğlu Abdullayevə, Elşən Ələkbər oğlu Verdiyevə general-leytenant, polkovnik Babək Vahid oğlu Qurbanova, Faiq Həmzəağa oğlu Məmmədova general-mayor ali hərbi rütbələr verilməsi haqqında sərəncam imzalayıb.
General-leytenant Cavid Mirhəmzə oğlu Abdullayev – Lənkəranda anadan olub. Cavid Abdullayev ikinci Qarabağ müharibəsində göstərdiyi böyük şücaətə görə “Qarabağ” ordeninə layiq görülüb. Xidmət illəri ərzində “İgidliyə görə” medalı ilə, 2-ci dərəcəli “Vətənə xidmətə görə” ordeni ilə təltif olunub. Hazırda DSX-nin Maddi-Texniki Təminat Baş İdarəsinin rəis müavini vəzifəsində çalışır.
General-leytenant Elşən Ələkbər oğlu Verdiyev – Yardımlıda anadan olub. O, uzun illər Dövlət Sərhəd Xidməti Akademiyasının rəisi olub. Ötən ilin may ayında Dövlət Təhlükəsizlik Xidmətinin keçirdiyi əməliyyatda saxlanılan DSX Sahil Mühafizəsinin rəisi general-leytenant Nağıyev Əfqan Vəli oğlu saxlanıldıqdan sonra, onun yerinə təyinat alıb. Elşən Verdiyev hazırda Dövlət Sərhəd Xidmətinin Sahil Mühafizəsi İdarəsinin rəisi vəzifəsində çalışır. Xidmət illəri ərzində bir sıra orden və medallarla təltif edilib.
General-mayor Babək Vahid oğlu Qurbanov – 1982-ci ildə Naxçıvanın Şahbuz rayonunda anadan olub. Polkovnik kimi Vətən müharibəsində iştirak edən B.Qurbanov Prezident İlham Əliyev tərəfindən “Vətən Müharibəsi Qəhrəmanı” adına layiq görülüb. Eyni zamanda “Cəbrayılın azad olunmasına görə”, “Zəngilanın azad olunmasına görə” medalları ilə də təltif edilib. Maraqlıdır ki, Babək Qurbanovun əkiz qardaşı Bayram Qurbanov da hərbçidir. Babək Qurbanovdan fərqli olaraq, əkiz qardaşı Xüsusi Təyinatlı Qüvvələrin zabitidir. Polkovnik-leytenant Bayram Qurbanov da qardaşı kimi Vətən Müharibəsinin iştirakçısı olub və Prezident tərəfindən Şuşanın, Kəlbəcərin, Cəbrayılın azad olunmasına görə, eləcə də “Döyüşdə fərqlənməyə görə” medalları ilə təltif edilib.
General-mayor Faiq Məmmədov – Müdafiə Nazirliyinin Hərbi Hava Qüvvələri və Hava Hücumundan Müdafiə qoşunlarında xidmət edib. Faiq Məmmədov uzun müddət HHQ və HHM qoşunlarının Bakı yaxınlığındakı hərbi hissələrindən birinin komandiri olub. Sabiq komandan, general-leytenant Rail Rzayevin ən yaxın adamlarından biri kimi tanınıb. F.Məmmədov 2013-cü ilin noyabr ayında Müdafiə Nazirliyində təxris olunandan sonra, Dövlət Sərhəd Xidmətində xidmətini aviasiya sahəsində davam etdirib. DSX-da xidmətdə olarkən F.Məmmədov Prezident İlham Əliyevin sərəncamı ilə, 2014-cü ildə “Vətən uğrunda” medalı ilə, 2016-cı ildə “İgidliyə görə” medalı, 2020-ci ilin dekabr ayında 3-cü dərəcəli “Vətənə xidmətə görə” ordeni ilə təltif edilib.
Ehtiyyata buraxılan generallarla bağlı maraqlı məlumatlar
Xəbər verdiyimiz kimi, Dövlət Sərhəd Xidməti rəisinin iki müavini – general-leytenant Azad Ələkbərov və general-leytenant İsmayıl Əkbərov ehtiyata buraxılıb. Qaynarinfo ehtiyata buraxılan generalların kimliyini araşdırıb. General-leytenant Azad Ələkbərov – O, 2012-ci ildə isə DSX Sərhəd Qoşunları Baş Qərargahının Dövlət Sərhədinin Mühafizəsi İdarəsinin rəisi vəzifəsinə təyin olunub. 2013-cü ildə general-mayor rütbəsində Azad Ələkbərov Dövlət Sərhəd Xidmətinin (DSX) rəisinin şəxsi heyət üzrə müavini – Şəxsi Heyət üzrə Baş İdarənin rəisi vəzifəsinə təyin edilib.
2015-ci ilin avqust ayının 17-də ölkə başçısının sərəncamı ilə general-leytenant ali hərbi rütbəsi verilib. Prezident onu bir sıra orden və medalları ilə təltif edib. 2013-cü ildə “Hərbi xidmətlərə görə”, 2020-ci ildə 3-cü dərəcəli “Vətənə xidmətə görə” ordeni ilə təltif olunub. Azad Ələkbrov Füzulinin Böyük Bəhmənli kəndindəndir. Atası Qaçay Ələkbərov uzun illər polis orqanlarında yüksək vəzifələrdə xidmət edib. General-leytenant İsmayıl Əkbərov – 2013-cü ildə DSX rəisinin müavini – Maddi Texniki Təminat Baş İdarəsinin rəisi. 2016-cı ilin avqust ayının 16-da ölkə başçısının sərəncamı ilə İsmayıl Bayram oğlu Əkbərov general-leytenant ali hərbi rütbəsi verilib. Ölkə başçısının sərəncamı ilə 2004-cü ildə “Hərbi xidmətlərə görə” medalı ilə, 2019-cu il sərəncamı ilə 2-ci dərəcəli “Vətənə xidmətə görə” ordeni, 2020-ci ildə 1-ci dərəcəli “Vətənə xidmətə görə” ordeni ilə ilə təltif olunub.
